क्रिस्टियानो रोनाल्डोको शतक प्रतिक्षा…

रोनाल्डोले गत वर्ष नोभेम्बरमा लक्जेम्बर्गविरुद्ध ९९ औं गोल गरेपछि राष्ट्रिय टोलीका लागि गोल थपेका छैनन् । अघिल्लो साता क्रोएसियाविरुद्ध खेलमा रोनाल्डोले यस दुर्लभ उपलब्धि हासिल गर्ने देखिएको थियो । तर राष्ट्रिय टोलीको प्रशिक्षणमा उनको खुट्टाको बुढी औंलामा मौरीले टोकेपछि उनले खेल्न सकेनन् ।

रोनाल्डोको खुट्टामा मौरीले टोकेपछि घाउ बिग्रेको थियो । त्यसकारण उनले शनिबार क्रोएसियाविरुद्ध खेलमा उत्रन सकेनन् । आइतबारको प्रशिक्षणमा सामेल भएपछि रोनाल्डो अब मंगलबार हुने खेलमा सहभागी हुने सम्भावना बलियो छ । प्रशिक्षक फर्नान्डो सान्तोसले बुधबार मौरीले टोकेपछि उनले प्रशिक्षण गर्न नसकेको बताएका थिए ।

रोनाल्डो मंगलबार सोलनामा हुने स्विडेनविरुद्ध खेलमा सहभागी हुँदै सयौं गोल पूरा गर्ने सुरमा हुनेछन् । यस स्थानमा रोनाल्डोको बेग्लै इतिहास पनि छ । सन् २०१३ मा विश्वकप छनोटको प्लेअफमा ज्लाटन इब्रहिमोभिचको कप्तानीमा रहेको स्विडेनविरुद्ध रोनाल्डोले उत्कृष्ट प्रदर्शन गरेका थिए । पहिलो लेगमा निर्णायक गोल गरेका रोनाल्डोले दोस्रो लेगमा भने ह्याट्रिक पूरा गरेका थिए ।

रोनाल्डोबिना पनि नेसन्स लिगको पहिलो खेलमा टोलीले क्रोएसियालाई ४-१ ले पराजित गरेको थियो । एकपक्षीय खेलमा पोर्चुगलले झन्डै १ दर्जन गोलको अवसर सिर्जना गरेको थियो । स्विडेनविरुद्ध रोनाल्डोको आगमनले पोर्चुगलको आक्रमण अझै बलियो हुने अनुमान गरिएको छ ।

युभेन्टस स्टार रोनाल्डोसँगै म्यानचेस्टर युनाइटेडका ब्रुनो फर्नान्डेस, म्यानचेस्टर सिटीका बर्नार्डो सिल्भा र एटलेटिको म्याड्रिडका जोआओ फेलिक्सले उत्कृष्ट प्रदर्शन गर्दै आएका छन् । पछिल्लो खेलमा वल्भ्सका डिओगो जोटा र युभेन्टसका जोआओ क्यान्सेलोले पनि प्रभावशाली प्रदर्शन गरेका थिए ।

३५ वर्षीय रोनाल्डो अन्तर्राष्ट्रिय फुटबलमा सर्वाधिक गोल गर्ने कीर्तिमान पछ्याइरहेका छन् । हाल इरानका अलि दाइ १ सय ९ गोलका साथ शीर्षस्थानमा रहेका छन् । रोनाल्डोको कप्तानीमा पोर्चुगलले सन् २०१६ मा युरो कप जितेको थियो । गत सिजन नेदरल्यान्ड्सलाई फाइनलमा पराजित गर्दै पोर्चुगल नेसन्स लिगको च्याम्पियन पनि बनेको थियो ।

WRITE COMMENTS FOR THIS ARTICLE