चिसोका कारण जनजीवन प्रभावित

रसुवा, वर्षासँगैको हिमपातले रसुवाको जनजीवन कष्टकर बन्दै गएको छ । बिहानैदेखिको हिमपातका कारण अत्याधिक चिसो बढ्न गई हिमाली क्षेत्रको जनजीवन कष्टकर हुनुका साथै लाङटाङ तथा गोसाइँकुण्ड क्षेत्रमा आवतजावत गर्नसमेत कठिनाइ भएको चन्दनबारीका होटल व्यवसायी सुब्बा लामाले बताउनुभयो ।

उत्तरी रसुवाको भूभागअन्तर्गत समुद्री सतहदेखि दुई हजार ९०० मिटरको उचाइसम्म परेको हिमपातले चरन क्षेत्र छोपिँदा पशुको आहारामा समेत समस्या बढ्दै गएको स्थानीय किसानले बताएका छन् । चन्दनबारी, देउराली, लाङटाङ, गतलाङसमेतका मानव बस्तीमा हिउँ परी सकेको वृद्विमका ङवाङ तामाङले जानकारी दिनुभयो ।

हिउँपरेका बेला घरबाट बाहिर नजान रसुवावासीलाई आग्रह गर्दै सहायक प्रमुख जिल्ला अधिकारी सपनाकुमारी भट्टराईले हिँडडूल गर्नुपर्ने अवस्था आएमा साथीको साथमा होसियारपूर्वक जान सुझाव दिनुभयो ।

प्रदेश नं ५ अन्र्तगत रुकुमपूर्वको उच्च हिमाली क्षेत्रमा हिमपात भएको छ । हिमपात भएसँगै चिसो बढेको छ । हिमपातकै कारण लामो समयसम्म पत्थरमात्र देखिने हिमाल सेतै देखिएका छन् । चिसोका कारण जनजीवन भने प्रभावित बनेको छ । बिहीबार जिल्लाको उच्च हिमाली क्षेत्रमा भएको हिमपात शुक्रबार लेकाली बस्तीसम्म पुगेको छ ।
रुकुमपूर्वमा हिमपात, चिसोले जनजीवन प्रभावित

जिल्लाको पुथाउत्तरगङ्गा गाउँपालिकाको अधिकांश ठाउँमा हिउँ परेको छ । त्यसैगरी भूमे गाउँपालिकाको हिरछेडा (पातीहाल्ने), रिगल, तिलाचन, नोगोपो, चौरी, राङ्ज्यू, पञ्चासे, काँक्री सिद्धगुफा, बोप्पलेकलगायत आदि क्षेत्रमा हिमपात भएको छ । त्यसैगरी सिस्ने गाउँपालिकाका वडा नं १ ठूलोसिस्ने, वडा नं २ को प्वाङ बस्तीको माथिल्लो क्षेत्र र दादिङको माथिल्लो क्षेत्रमा हिमपात भएको छ । हिमपात भएसँगै नागरिकलाई दैनिक कामकाज गर्नुका साथै बाहिर निस्कनसमेत समस्या भएको छ । हिमपात र चिसोकै कारण पशुचौपायलाई पनि समस्या भएको छ । उच्च हिमाली तथा लेकाली क्षेत्रमा हिमपात भएपछि पशुचौपायको चरण क्षेत्र अभाव भएको पुथाउत्तरगङ्गा गाउँपालिका वडा नं १ का सुमन घर्तीले बताउनुभयो ।

हिमपातसँगै रुकुमपूर्वलगायत आसपासका क्षेत्रमा टेलिफोन सेवा अवरुद्ध भएको छ । घामको भरमा सञ्चालन हुने रुकुमपूर्वका टावर आकाशमा बादल देखिने बित्तिकै फोनले काम गर्न छाड्छ । फोनले काम गर्न छाडेपछि जिल्लामा हिमपात भइरहेको बेलामा कहाँ के भइरहेको छ भन्ने कुराको जानकारी लिन र दिनसमेत समस्या भइरहेको जिल्ला प्रशासन कार्यालय रुकुमपूर्वले जनाएको छ ।

हिमपातले कत्तै खुशी, कतै बेखुशी

कर्णाली प्रदेशका हिमाली जिल्लामा भारी हिमपात भइरहदा कतै खुशी थपिएको छ भने कतैका नागरिक वेखुशी भएका छन् । जाजरकोट, डोल्पा, जुम्ला, हुम्ला र मुगुमा भारी हिमपात भएपछि यहाँ परीक्षा अवरुद्ध हुँदा विद्यार्थी दुःखी भएका छन् । डोल्पा ठुली भेरी नगरपालिका कुम्लीस्थित विद्यालयका शिक्षक जयकृष्ण हमाल भन्नुहुन्छ, “हिमपातले पूरै दिन पढाइ नहुने डोल्पामा आधा पढेर परीक्षा दिने विद्यार्थीले जाँच नै दिन प्रकृतिले पनि अवरोध गरेको छ ।” ठूलीभेरी नगरपालिकाअन्तर्गत पर्ने एउटा आधारभूत र चार वटा माध्यमिक विद्यालयको वार्षिक परीक्षा स्थगन भएको ठूलीभेरी नगरपालिकाका शिक्षा शाखा प्रमुख दिलप्रसाद रोकायले जानकारी दिनुभयो ।

पुस र माघमा भारी हिमपात हुने भएकाले वार्षिक परीक्षा सम्पन्न गरेर दुई महिनाका लागि सम्पूर्ण विद्यालय बन्द हुने गर्दछ । विद्यार्थी आगो बालेर परीक्षा दिन प्रयास गरे पनि सफल नभएपछि स्थगित गरिएको हो । जुफालस्थित विमानस्थल हवाई सेवा अवरुद्ध भएकाले यात्रुहरुलाई समस्या भएको छ । हुम्ला र जुम्लामा समेत हवाई सेवा अवरुद्ध भएको छ । जुफाल विमानस्थलमा गएको समिट एयरको जहाज नेपालगञ्ज फर्कन नसक्दा विमानस्थलमै रोकिएको छ ।

त्यस्तै जाजरकोटको बारेकोट गाउँपालिका, जुनिचाँदे गाउँपालिका, कुशे गाउँपालिकामा भारी हिमपात भएको छ । हिमपातका कारण यो क्षेत्रमा विद्यालय र सरकारी कार्यालयको कामसमेत ठप्प भएको छ ।

उता कृषकहरु भने खुशी भएका छन् । आकाशे पानीको भरमा लगाएको गहुँ, जौउ, तरकारीबाली हिमपातका कारण सप्रिने भएपछि कृषकहरु खुशी भएका हुन् । जिल्लाका सातै वटा स्थानीय तहका स्थानीयवासी पानी परेका कारण हिउँदेवाली सप्रिने भन्दै खुशी भएको बारेकोट गाउँपालिकास्थित वीरेन्द्र ऐश्वर्य माविका प्रधानाध्यापक गोरखबहादुर सिंहले जानकारी दिनुभयो । जाजरकोटका गाउँगाउँमा फोन सेवासमेत अवरुद्ध भएको छ ।

जाजरकोट, डोल्पाका आन्तरिक सडक हिमपातले गर्दा अवरुद्ध भएको स्थानीय सरकारका प्रमुुखले बताएका छन् । उपल्लो डोल्पामा हिमपात अत्यधिक मात्रामा भएका कारण स्थानीयवासीहरु घरदेखि बाहिर निस्किन सकेका छैनन् । पिउने पानीसमेत जमेका कारण हिउँ तताएर पगाली पानी प्रयोग गर्न बाध्य भएको स्थानीयले बताएका छन् ।

लगातार केही दिनदेखि बादल लागेका कारण ग्रामीण क्षेत्रमा रहेका टावरमा सौर्यऊर्जा ‘चार्ज’ नहुँदा टावर अवरुद्ध भएका हुन् । यातायातको पहुँच नभएको ठाउँमा सञ्चालन हुने घोडा, खच्चडसमेत बिहानैदेखि लगातार पानी परेका कारण रोकिएको नलगाड नगरपालिका नगरप्रमुख टेकबहादुर रावलले जानकारी दिनुभयो ।

त्यस्तै सुर्खेतको सिम्ता गाउँपालिका–१ बाँखर्क र रोगारया बीच पर्ने मुलागल्पा पहिरो जाँदा छिन्चु – जाजरकोट सडक अवरुद्ध भएको छ । शुक्रबार बिहानदेखि परेको वर्षाका कारण पहिरो जाँदा दलबहादुर परियारको घरसमेत जोखिममा परेको छ । उक्त स्थानमा गएको पहिरो हटाउन सिम्ता गाउँपालिकाका अध्यक्ष कविन्द्रकुमार केसीसहित गाउँपालिकाको टिम जुटेको प्रहरीले जनाएको छ ।

त्यस्तै स्थानीय प्रशासनले विपत प्रतिकार्य योजनालाई कडाइका साथ लागू गर्न आग्रह गरेका छन् । स्थानीय सरकारसँग समन्वय गरेर चिसोकै कारण कसैको पनि अकालमै ज्यान नजावस भनि हिमाली जिल्लाहरुमा उच्च सर्तकतामा रहन आग्रह गरिएको छ । समस्या भएको ठाउँमा तत्काल राहत र न्यानो कपडा वितरण गर्नसमेत आग्रह गरिएको छ ।

भीमदत्त राजमार्ग अवरुद्ध

डोटी – लगातारको वर्षासँगै परेको हिमपातका कारण सुदूरपश्चिम प्रदेशको पहाडी जिल्ला जोड्ने एकमात्र पहाडी राजमार्ग भीमदत्तराजमार्ग अबरुद्ध भएको छ । हिमपातका कारण भीमदत्त राजमार्गको साहुखर्क सडक खण्ड पूर्णरुपमा अवरुद्ध भएको जिल्ला प्रहरी कार्यालय डोटीका प्रमुख तथा एसपी दिलीपसिंह देउवाले बताउनुभयो ।

उहाँले भन्नुभयो, “बाक्लो हिमपातका कारण राजमार्ग अवरुद्ध भएको छ, अवरुद्ध राजमार्ग खोल्नका लागि दिपायलबाट डोजर पठाएका छौँ, अलि हिमपात पर्न रोकिए खुल्न सक्छ ।” हिमपातले राजमार्ग अवरुद्ध हुँदा पहाडदेखि तराई जाने तथा तराईबाट पहाडका लागि आउँदै गरेका सयौँ यातायातका साधन तथा यात्रुहरु अलपत्रमा परेका छन् । अहिले उक्त राजमार्गमा कम्तिमा पनि दुई फिट जति हिउँ परेको प्रहरीले जनाएको छ । हिमपातका कारण त्यहाँको जनजीवनसमेत प्रभावित बनेको छ ।

WRITE COMMENTS FOR THIS ARTICLE