पीसीआर परीक्षणका लागि प्रयोगशाला, ४ वटा काठमाडौँ उपत्यकामा र ६ वटा अन्य जिल्लामा थपिँदै

स्वास्थ्य तथा जनसङ्ख्या मन्त्रालयले थप १० ठाउँमा कोभिड–१९ को परीक्षणका लागि पीसीआर प्रयोगशाला स्थापना गर्ने भएको छ । जसमध्ये चार वटा काठमाडौँ उपत्यकामा र ६ वटा अन्य जिल्लामा छन् ।

कोभिड–१९ को परीक्षणको दायरा बढाउनका लागि १० ठाउँमा प्रयोगशाला स्थापना गर्न थालिएको मन्त्रालयका इन्सिडेन्ट कमाण्ड सिस्टमका संयोजक डा. गुणराज लोहनीले जानकारी दिए । उनका अनुसार काठमाडौँका राष्ट्रिय आयुर्वेद अनुसन्धान तथा तालीम केन्द्र, सशस्त्र प्रहरी अस्पताल बलम्बु, नेपाल प्रहरी अस्पताल र नेपाली सेना अस्पताल काठमाडौँमा प्रयोगशाला स्थापना गरिनेछ ।

काठमाडौँबाहिर मेची अस्पताल झापा, डडेल्धुरा अस्पताल, दैलेख अस्पताल, पाल्पा अस्पताल तानसेन, धौलागिरि अस्पताल बागलुङ र धनकुटा अस्पतालमा पीसीआर मेसिन स्थापना गरिनेछ ।

अहिले मुलुकभर २३ स्थानमा पिसिआर विधिबाट कोभिड–१९ को परीक्षण भइरहेको छ । यी नयाँ १० ठाउँसँगै अब ३३ ठाउँबाट कोभिड–१९ को पिसिआर विधिबाट परीक्षण हुनेछ । मन्त्रालयले सम्भावित सङ्क्रमितको अवस्था हेरेर ती ठाउँमा प्रयोगशाला स्थापना गर्न थालेको हो ।

नयाँ ठाउँबाट कोभिड–१९ को परीक्षण गरे दैनिक १० हजार जनाको परीक्षण गर्न सकिने मन्त्रालयले जनाएको छ । अहिले २३ प्रयोगशालाबाट दैनिक छ हजार पिसिआर विधिबाट परीक्षण गर्दै आइरहेको छ । अहिलेसम्म दुई लाख छ हजार २७१ जनाको पिसिआर परीक्षण गरिएको छ ।

WRITE COMMENTS FOR THIS ARTICLE