फास्ट ट्रयाक निर्माण : १४ हजार ६६९ रोपनी जग्गा अधिग्रहण

काठमाडौं,

राजधानी काठमाडौं र तराई–मधेस जोड्ने द्रुत मार्ग (फास्ट ट्रयाक ) निर्माण अन्तर्गत १४ हजार ६ सय ६९ रोपनी जग्गा अधिग्रहणको काम सम्पन्न भएको छ । १५ हजार ४ सय ६८ रोपनी जग्गा अधिग्रहण गर्नुपर्नेमा फास्ट ट्रयाकको ७ सय ९९ रोपनी जग्गाको मात्र मुअब्जा दिन बाँकी रहेको छ।

७२ दशमलव ५ किलोमिटरको फास्ट ट्रयाक निर्माणमा विस्तृत आयोजना प्रतिवेदन (डीपीआर) अन्तर्गत २ सय २८ रोपनी जग्गा थप अधिग्रहण गर्नुपर्ने भएको छ । नेपाली सेनाका प्रवक्ता विज्ञानदेव पाण्डेले जग्गा मुआब्जाको ९५ प्रतिशत काम सम्पन्न भएको जानकारी दिँदै बाँकी जग्गाको अधिग्रहण गर्ने प्रक्रिया अगाडि बढिसकेको बताउनुभयो।

खोकना, बुङ्मती, डुकुछाप, महादेवटार, धेत्रे र लेनडाँडामा डीपीआरको रिपोर्ट अनुसार २ सय २८ रोपनी जग्गा अधिग्रहण गर्नुपर्ने भएको उहाँले बताउनुभयो । खोकना, बुङ्मती, सिकाली लगायतको क्षेत्रसहित अब ७ सय ९९ रोपनी जग्गा अधिग्रहण गर्नुपर्ने भएको हो।

डिपिआरको रिपोर्ट अनुसार समयसीमाभित्र नै फास्ट ट्रयाक निर्माणको काम सम्पन्न गरिने बताउदै प्रवक्ता पाण्डेले ठाउँठाउँमा बेलिब्रिज निर्माण भइरहेको जानकारी दिनुभयो । उहाँका अनुसार विभिन्न ठाउँमा गरी १२ वटा बेलिब्रिज जडान गरिने भएको छ। नेपाली सेनाले आगामी साढे तीन बर्षभित्र फास्ट ट्रयाक निर्माण गर्ने लक्ष्य लिएको छ।
नेपाल समाचारपत्रमा प्रकािशित छ।

WRITE COMMENTS FOR THIS ARTICLE