समाजसेवामा सेवामा कराेडाैँ रूपयाँ सहयाेग गर्ने एक गुमनाम दम्पत्ति

भनिन्छ, ‘ती मानिसहरूका जीवन सार्थक हुन्छ, जो अरूका लागि पनि बाँच्दछन् ।’ हुन पनि हो, जसले अरूका लागि केही योग्दान दिन्छन् तिनीहरू सम्झीरहन्छन् । अरूबाट केही लिँदा वा लिन पाउँदा खुुसी मान्ने मानिसहरूको स्वभाव हो । तर, समाजमा कमै मानिसहरू हुन्छन् , जो अरूलाई दिँदा आनन्द मान्छन् , जसरी अरूले लिँदा आनन्द महसुस गर्छन् । आर्थिक, भौतिक तथा नैतिक समर्थन गरेर मानिसहरूले अरुलाई सहयोग गरिहेका हुन्छन् ।

पछिल्लो समय अरूलाई सहयोग गर्ने व्यक्ति तथा संस्थाहरू बढी प्रचारबाजीमा लागेको आरोपहरू पनि सुन्न पाइन्छ । सानातिना सहयोगलाई पनि ठुलो बनाएर प्रचार गर्ने र दुनियाँलाई थाहा दिनुपर्ने मान्नेताबाट ग्रसित समाजसेवा निस्वार्थ नभएको टिप्पणीहरू पनि सुनिन्छ । खैर, तर कतिपय यस्ता व्यक्ति तथा संस्थाहरू पनि छन्, जसले करोडौँ रूपैयाँ बराबरको सहयोग गरेर पनि गुमनाम छन् । जो प्रचारको पछि लाग्दैनन् । त्यस्ता संस्थाहरूमध्ये एक हुन्, हेम एण्ड माया थापा फाउण्डेसन ।

तेह्रथुमको मोराहांङ ९ सिकिदिम घर भई हाल अमेरिकाको न्युयोर्क बसोबास गर्दै आएका हेम एण्ड माया थापा फाउण्डेसनले देश तथा विदेशमा रहेर समस्यामा परेकालाई २३ करोड रुपियाँ सहयोग गरेको छ । समाज सेवामा लागेर करोडौँ रुपियाँ सहयोग गरेको भए पनि फाउण्डेशन खासै चर्चामा आएको छैन । दुः ख कष्ट भोगेर सहेर आफू विपन्न परिवारमा जन्मेको भए पनि दुः ख र पीडालाई बुझेर नै समाजसेवामा लागेको थापाले बताए ।

विदेश बस्नु भएको ३१ वर्ष भए पनि अहिले उनीहरूले नेपालमा हेम एण्ड माया थापा फाउण्डेसन नेपाल संस्था दर्ता गरी विभिन्न क्षेत्रमा आर्थिक सहयोग गदै आएका छन् । हालसालै सो फाउण्डेशनले सुदूरपश्चिममा भएको भूकम्प पीडितलाई आर्थिक सहयोग प्रदान गरेको छ । गत बुधबार राति गएको भूकम्पका कारण सुदूरपश्चिम प्रदेशको पहाडी जिल्ला डोटीको पूर्वचौकी गाउँपालिका ३ गैरागाउँमा मानवीय क्षति भएको थियो ।

समाजसेवी थापाले मृतकका परिवारलाई ५० हजार रुपियाँ सहयोग गरेका छन् । फाउण्डेसनले विभिन्न विपद्मा परेकाहरूका लागि आर्थिक सहयोग प्रदान गर्दैआएको छ ।

त्यस्तै, गरिब निमुखाहरूलाई स्वास्थ्य उपचारका लागि नगद र जेहेन्दार विद्यार्थीलाई शैक्षिक सामग्री उपलब्ध गराएको छ । सो फाउण्डेसनले पर्साको मौवानमा एक विद्यालयको भवन पनि निर्माण गरेको फाउण्डेसनकी सदस्य माया थापाले बताएकी छन् ।

२०७२ को भूकम्पमा पनि थापाले खाद्य, त्रिपाल, लुगा कपडा र नगद गरी ३० लाख सहयोग गरेको थियो । फाउण्डेसनका संस्थापक थापाले विभिन्न विपतमा परेकाहरूको उपचार, राहत र आर्थिक सहयोग गरी एक करोड सहयोग गरेको बताए । बाढी, पहिरो, हावाहुरी जाँदा विभिन्न ठाउँमा मठ, मन्दिर, विद्यालय, हस्पिटल, पाटीपौवा, पुराना लगाउँदा २५ देखि ३० लाख गरिसकेको जानकारी दिएका छन् ।

त्यस्तै, विदेशमा मृत्युदण्ड पाएका प्रेम राईलाई पाँच लाख, कुमार रानामगरलाई दुई लाख, खड्क जोगीलाई ६ लाख, विनोद रानाभाटलाई एक लाख गरी चौध लाख सहयोग गरी उद्धार गरेको बताएका छन् ।

विगत ३९ वर्षदेखि समाजसेवामा सक्रिय थापा दम्पतीले असहाय बालबालिकाको शिक्षादीक्षाका लागि आजसम्म ५६ हजार ७ सय ९२ जनाभन्दा बढीलाई सहयोग प्रदान गरेको छ ।

निस्वार्थ भावले विपन्नमा परेका र खाँचाे परेकालाई सहयाेग गरेकाे हुनाले प्रचारबाजीकाे जरुरी नभएकाे दम्पत्तिकाे भनाइ छ । कसैले थाहा पाए पनि नपाए पनि समाजेवामा निरन्तर लागिरहने दम्पत्तिकाे अठाेट छ । (गाेरखापत्र अनलाइनकाे सहयाेगमा)