हिमाल दर्पणको समाचार प्रभावः आर्थिक अभावले मृत्यु कुरिरहेकी सानीले उपचार पाउँदै

काठमाडौं । आर्थिक अभावका कारण घरमै थलिएर मृत्यु पर्खेर बसिरहेकी सानी थिङ तामाङले उपचार पाउने भएकी छन् । आर्थिक अभावका कारण सानीले उपचार नपाएको विषयमा हिमाल दर्पण डटकममा समाचार प्रकाशित भएपछि सहयोगी हातहरूको लर्को लागेको छ ।

बिहीबार साँझ “आर्थिक अभावका कारण उपचार नपाउँदा मृत्यु कुर्दै १५ वर्षकी सानी थिङ” शीर्षकमा हिमाल दर्पण डटकममा समाचार प्रकाशित भएको थियो । उक्त समाचार प्रकाशित भएपछि सानीलाई काठमाडौं ल्याउनका लागि काठमाडौंमा रहेकी छिमेकी मुना थिङ तामाङले एम्बुलेन्स पठाएकी हुन् ।

हिमाल दर्पण डटकममा प्रकाशित समाचार

काठमाडौं ल्याएपछि हिमाल दर्पणका समाचार सम्पादक चन्द्र तामाङको विशेष पहलमा सहयोग रकम सङ्कलन सुरु भएको हो । शनिवार दिउँसोसम्म एक लाख पच्चीस हजार रुपैयाँ आर्थिक सङ्कलन भएको पत्रकार तामाङले जानकारी दिएका छन् ।

सानीको त्रिवि शिक्षण अस्पताल महाराजगन्जमा सघन उपचार कक्ष (आइसियु)मा राखेर उपचार भइरहेको छ । बिरामीको अवस्था स्थिर रहेको र सबै परीक्षणको रिपोर्ट आएपछि मात्रै रोगबारे भन्न सकिने उपचारमा संलग्न चिकित्सकलाई उद्धृत गर्दै पत्रकार तामाङले जानकारी दिएका छन् ।

सानीका अनुसार उनलाई ६ महिनाअघि अचानक खुट्टा दुख्ने, पोल्ने र झमझमाउन थालेको थियो । सामान्य समस्या होला, एक दुई दिनमा निको भइहाल्छनी भन्दै बेवास्ता गर्दै बसेकी उनलाई झन्झन् गाह्रो हुँदै गयो । तत्काल अस्पताल जान आर्थिक अभाव भयो । गाउँमै बसेर धामी झाँक्रीलाई देखायो । तर, स्थिति झन् झन् बिग्रिँदै गयो । तीन महिनाअघिदेखि उनी हिँडडुल गर्न नसक्ने भइन् ।

अहिले कम्मर मुनिको भाग नचल्ने भइसकेको छ । खुट्टाबाट सुरु भएको दुखाई अहिले छातीसम्म पुगिसकेको छ । हात पनि चलाउन सक्दिनन् ।

अहिलेसम्म सानीलाई कुन रोग लागेको हो भन्नेसम्म पनि पत्ता लागेको छैन । अवस्था निकै नाजुक भइसकेको छ । सघन उपचार कक्षमा राखेर थप परीक्षणहरू थालिएको छ । सबै रिपोर्टहरू नआउन्जेल केही बताउन नसकिने उपचारमा संलग्न चिकित्सकहरूले बताएका छन् ।