निर्वाचनका दिन कोरोना विरुद्धको खोप सञ्चालन नहुने

काठमाडौं ।  यही वैशाख ३० गते हुने स्थानीय तहको निर्वाचनमा कोरोना भाइरसविरुद्धको खोप अभियान नहुने भएको छ । स्वास्थ्य तथा जनसङ्ख्या मन्त्रालयको अनुसार निर्वाचनका दिन अतिरिक्त खोप केन्द्र तथा नियमित खोप अभियान सञ्चालन गर्न कठिनाइ पर्ने भएकाले उक्त दिन खोप कार्यक्रम स्थगित गरिने भएको हो ।

निर्वाचन अघि र पछिका दिनमा भने खोप केन्द्रमा नियमित खोप अभियान सञ्चालन हुने भएकाले सबैलाई सकेसम्म कोभिड–१९ विरुद्धको खोप लगाउन अनुरोध गरिएको छ ।

पछिल्ला दिनमा भारतमा सङ्क्रमण बढ्दै गएकाले नेपालमा पनि जोखिम बढ्ने सम्भावना भएकाले सर्तक रहँदै जनस्वास्थ्यका मापदण्ड अपनाउन मन्त्रालयले आग्रह गरेको छ ।