धार्मिक पर्यटक आकर्षित गर्दै ‘महाराजा थान’

काठमाडौं । पूर्वी नवलपरासीको सदरमुकाम कावासोती बजारबाट करिब ७ किलोमिटर उत्तरमा रहेको महाराजा थान मन्दिर धार्मिक पर्यटनको गन्तव्यका रूपमा विकसित भइरहेको छ । उक्त मन्दिर परापूर्व कालमा राजा मणिमुकुन्द सेनले स्थापना गरी पूजापाठ गर्न सुरु गरिएको थियो । सो मन्दिरमा गई भाकल मागे पूरा हुने जनविश्वास रहेकाले मन्दिरमा भाकल चढाउन र पूजाआजा गर्न भक्तजनहरूको बाक्लो भीड लाग्ने गरेको छ ।

महाराजा बाबालाई साँचो मनले सम्झिएर गरेको भाकल पूरा हुने भएकाले यस मन्दिरमा दिनहुँ भाकल गर्न र पूजापाठ गर्न आउनेहरूको सङ्ख्या बढ्दै गएको मन्दिरका पुजारी शिवराज महतोले जनाएका छन् । यहाँ भाकल गरिएका सबै कुरा पूरा हुनु यो मन्दिरको विशेषता रहेकाले यहाँका स्थानीयवासी मात्र होइन मन्दिरमा पूजा गर्न जाने भक्तजनसमेत चकित पर्ने गरेको उनले जनाए ।

यस मन्दिरमा भाकल गर्न र पूजापाठ गर्न भारतको देहरादुनबाट नेपालका लगभग सबै क्षेत्रका तीर्थालु आउने गरेका पुजारी महतोले बताए । कावासोती नगरपालिका–१ मा पर्ने यो धार्मिकस्थल जिल्लाकै मुख्य धार्मिक र पर्यटकीयस्थल मानिन्छ । यद्यपि आम श्रद्धालु र घुमन्ते पर्यटकको रोजाइमा परे झैँ सरकारको नजरमा भने यो पुण्यधाम नपरेको कावासोतीवासी गुनासो गर्छन् ।

प्रचारप्रसारको अभावले ओझेलमा परेको भए पनि पछिल्ला केही वर्षदेखि यहाँ आउने भक्तजन उल्लेख्य रूपमा बढ्दै गएको मन्दिर व्यवस्थापन समितिका अध्यक्ष चेतबहादुर थापाले जनाए । उनले मन्दिर नजिकै वनभोजस्थलको समेत व्यवस्थापन भएपछि पछिल्लो समय वनभोजका लागि आउनेहरू पनि बढ्दै गएको बताए । चिसो हावा र यहाँबाट देखिने मनोरम दृश्यका कारण वनभोजका लागि यो ठाउँ पर्यटकको रोजाइमा पर्ने गरेको हो ।

मन्दिर व्यवस्थापन समितिले यस क्षेत्रको विकास र विस्तारका लागि गुरुयोजना बनाएको र सो अनुसारका पूर्वाधार थप गर्न करिब रु एक करोडभन्दा धेरै रकम आवश्यक पर्ने जनाएको छ । स्थानीय तह, प्रदेश र संघीय सरकारले दिनुपर्ने जति चासो नदिएको अध्यक्ष थापाको गुनासो छ ।