“पर्यटन दशक वा महोत्सव मनाउँदैमा पर्यटक आउँदैन”, –आङछिरिङ शेर्पा

काठमाडौं । पर्यटनविद् आङछिरिङ शेर्पाले पर्यटन दशक वा महोत्सव मनाउँदैमा पर्यटकको सङ्ख्या नबढ्ने बताएका छन् । गत शुक्रवार (वैशाख १ गते) एनटिपी मल्टिमिडिया ग्रुपद्वारा वसन्तपुरमा आयोजित नेपाल पर्यटन महोत्सवमा “हिउँ, हिमाल र हिमालय” शीर्षकमा बहस गर्दै शेर्पाले पर्यटन पूर्वाधारको विकास विना पर्यटकको सङ्ख्या नबढ्ने बताएका हुन् ।

“पर्यटकहरू घुम्न आउँदा आफू जान लागेका ठाउँमा के कस्ता सेवा सुविधाहरू छन्, सुरक्षाको अवस्था कस्तो छ, पूर्वाधारहरूको अवस्था के छ भन्ने बुझेर मात्रै आउँछन् । नेपालको पर्यटन पूर्वाधारको अवस्था राम्रो छैन”, शेर्पाले भने, “पर्यटन पूर्वाधारको विकास गर्ने हो भने पर्यटन दशक वा महोत्सव केही पनि मनाउनु पर्दैन । पच्चिस–तीस लाख पर्यटक तुरुन्तै आउँछन् ।”

खासगरी हिमाली पर्यटन, पर्यटन व्यवसाय, अध्ययन, खोज तथा अनुसन्धानमा करिब ६ बिताइसकेका शेर्पाले नेपाल विश्वको उत्कृष्ट पर्यटकीय गन्तव्य भएर पनि पर्यटन नआउनुमा यहाँको पर्यटन पूर्वाधारको दयनीय अवस्था नै कारक भएको बताए ।

हवाई यातायातको सुविधा बढाउने नसके जतिसुकै प्रचार गरेपनि नेपालमा पर्यटकको आगमन नबढ्ने शेर्पाको भनाइ छ ।

“पर्यटन भन्ने बित्तिकै यातायात पूर्वाधारको कुरा प्राथमिक हुन्छ । विदेशी पर्यटक आउन हवाई यातायात राम्रो हुन जरुरी छ । तर, नेपालमा राष्ट्रिय ध्वजा वाहक नेपाल एयरलाइन्सको अवस्था लथालिङ्ग छ । सेवाको गुणस्तर अभिवृद्धि र विस्तार गर्न सकेको छैन”, शेर्पाल भने, “पर्यटकहरूलाई राष्ट्रिय ध्वजा वाहकप्रति बढी भरोसा हुन्छ । त्यसैले राष्ट्रिय ध्वजा वाहक नेपाल एयरलाइन्सले सेवा विस्तार गर्न नसकेसम्म नेपालमा पर्यटकको आगमन बढ्दैन । नेपाल एयरलाइन्ससँग कम्तीमा १५ वटा वाइडबढी हुने हो भने अहिले नै आउँछन् पच्चिस तीस लाख पर्यटक ।”

शेर्पाले नेपालको दिगो विकास गर्ने हो भने मुख्य आधार पर्यटन नै भएको बताए । पर्यटनको विकास विना नेपालको दिगो विकास र समृद्धि सम्भव नरहेको शेर्पाको भनाइ छ ।

“पर्यटन भनेको अरू व्यवसाय जस्तो होइन । यसबाट कम लगानीमा तुरुन्तै फाइदा लिन सकिन्छ । अरू व्यवसायमा बजार बनाउन, स्थापित हुन तीन वर्ष, पाँच वर्ष लाग्छ । तर, पर्यटनमा त्यस्तो हुँदैन । पर्यटक पुग्ने बित्तिकै त्यहाँको जनताको क्रय शक्ति बढ्छ ।” शेर्पाले भने ।

नेपाल प्राकृतिक एवम् सांस्कृतिक सम्पदाको खानी भएकाले पर्यटकीय आकर्षणहरूको निर्माण गर्न जरुरी नरहेको शेर्पाको भनाइ छ ।

“हामीसँग संसारमा कसैसँग नभएको सर्वोच्च शिखरसहितका हिमालय छन् । झरना, गुफा, पोखरी, ताल तलैया त्यतिकै छन् । सयौँ जातजाति, संस्कृति छन् । तिनलाई संरक्षण गर्ने हो, नयाँ नयाँ बनाउन आवश्यक छैन ।” शेर्पाले भने ।