जब पुरोहितलाई दीपेन्द्रले ‘कुमारी नफेरे देश निकाला गरिदिन्छु’ भने..!

– केदार सिटौला

२०४७ साल । भोटो देखाउने जात्रा हेर्न स्वर्गीय राजा वीरेन्द्रसँगै युवराज दीपेन्द्र पनि सवार थिए ।

रथमा थिइन्, ३८ वर्षीया जीवित कुमारी धनकुमारी बज्राचार्य ।

धनकुमारीलाई देख्नेबितिकै दीपेन्द्रले ‘यति ठूली केटी पनि कुमारी हुन्छ र ?’ भन्ने प्रश्न गरेका थिए ।

सामान्यतः सानी उमेरकी कुमारी देखिरहेका दीपेन्द्रले ‘ठूली’ कुमारी देखेर प्रश्न उठाउनु स्वाभाविक थियो । त्यसपछि दीपेन्द्रले कुमारीबारे छानबिन समिति नै गठन गरे आफ्नै नेतृत्वमा ।

महिनावारी नभइन्जेल कुमारीका रूपमा कुमारीघरमा रहने पाउने कुमारी प्रथा छ । तर, धनकुमारी भने ३८ वर्षको उमेरसम्ममा पनि महिनावारी भइनन् । छानबिन समितिले धनकुमारीको शारीरिक अवस्था जाँच गर्‍यो । सम्पूर्ण चेकअपपछि पनि कुमारीको शरीरमा कुनै दोष भेटिएन, सबै ठीकठाक थियो ।

अझै पनि दीपेन्द्रको चित्त बुझेन । त्यसपछि उनले दरबारका पुरोहितलाई बोलाई ‘धनकुमारीको ठाउँमा सानो कुमारी राख्नू अन्यथा तपाईँलाई देश निकाला गर्छु’ भनेर धम्की दिए । पुरोहित धर्मसंकटमा परे । पुरोहितले ‘यति ठूलो भगवान्लाई म कसरी हटाउन सक्छु’ भन्दै रोइकराइ गरे । कुमारीहरू हत्तपत्त परिवारका सदस्यबाहेक अन्य आगन्तुकसँग नबोल्ने नियम छ । यति हुँदाहुँदै पनि त्यति बेला भने धनकुमारीले मुख खोलिन्।

उनले भनिन्, ‘तिमीलाई जे हुकुम भएको हो त्यही गर, यसमा तिम्रो केही दोष हुनेछैन ।’ त्यसपछि धनकुमारी आफैँ कुमारीघरबाट हटिदिइन् र कुमारीले गर्ने सम्पूर्ण नियम पालन गरी आफ्नै घरमा कुमारीका रूपमा बस्न थालिन् !

अहिले उनी ७१ वर्षको उमेरमा पनि कुमारी नै छिन !